ភ្នំពេញ: នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានត្រលប់មកដល់កម្ពុជាវិញហើយនៅព្រឹកថ្ងៃទី២៦ ខែឧសភានេះ បន្ទាប់ពីបានទៅចូលរួមកិច្ចប្រជុំនៃវេទិកាសេដ្ឋកិច្ចពិភពលោកនៅប្រទេសស្វីស។
យន្តហោះពិសេសរាជរដ្ឋាភិបាលកម្ពុជា បានចុះចតនៅព្រលានយន្តហោះកម្ពុជានៅម៉ោងប្រមាណ ៦ និង៣០នាទីព្រឹក ថ្ងៃទី២៦ ខែឧសភា ឆ្នាំ២០២២។
មុននឹងចេញដំណើរមកកម្ពុជាវិញកាលពីថ្ងៃទី២៥ ខែឧសភា សម្ដេចតេជោ បានផ្ញើសារសំឡេងពិសេសមួយដល់ពលរដ្ឋខ្មែរដែលរស់សហភាពអឺរ៉ុបដែលបានមកទទួលស្វាគមន៍សម្ដេចកាលពីថ្ងៃសៅរ៍សប្ដាហ៍មុន។ សម្ដេចតេជោបានបង្ហាញអារម្មណ៍រីករាយ និងមោទនភាពចំពោះការគាំទ្ររបស់ប្រជាពលរដ្ឋនៅតំបន់នេះគាំទ្រដល់គណបក្សប្រជាជន និងរាជរដ្ឋាភិបាលកម្ពុជា។ សម្ដេចសង្ឃឹមថានឹងអាចវិលត្រលប់មកជួបពលរដ្ឋខ្មែររស់នៅសហភាពអឺរ៉ុបជាថ្មីម្ដងទៀតនៅក្នុងខែធ្នូ ឆ្នាំ២០២២ នៅទីក្រុងព្រុចសែល ប្រទេសប៊ែលហ្សិច ក្នុងឱកាសអបអរខួប ៤៥ឆ្នាំនៃទំនាក់ទំនងអឺរ៉ុប-អាស៊ាន៕
